ఆంధ్రభారతి వారి బాలభాష లోని “బాల” విభాగమే కాక శతకములు విభాగం కూడా ఆసక్తికరం. ఇక్కడ ఉన్నన్ని శతక పద్యముల సంగ్రహం నేను ఇంతవ్రకు అంతర్జాలంలో ఎక్కడా చూడలేదు. ఇవి అన్నీ “పిల్లల కోసం” అని కాదు కాని, ఇన్ని పద్యాలు ఒక చోట లభ్యమైనప్పుడు అందులో పిల్లలకు తగినవి ఎంచుకుని నేర్పడం కొంచెం సులభమవుతుంది కదా అని నా అభిప్రాయం. ఇంకొక ఆసక్తి కరమైన విషయం ఏంటంటే “దేశి”, “కవితలు” విభాగాలలో కూడా వెతుక్కుంటే పిల్లలకు నచ్చేవి, నప్పేవి కనిపిస్తాయి. అలా నాకు దొరికినది చావలి బంగారమ్మ గారి “పాప” కవిత.

మాగంటి   సేకరణలో బహుశా ప్రథమ స్థానం వీరిదేనేమో. ఇక్కడ “చిన్నారులు” విభాగంలో ఎన్నో అమూల్యమైన పద్యాలు, పాటలు, కథలు, పొడుపు కథలు, ఇంకా ఎన్నెన్నో పోగు చేసి ఉంచారు. సాహిత్యంగా దొరికేవే కాక తర తరాలుగా పెద్ద వారి నుండి చిన్న వారికి ముఖతా అందిన ఆణిముత్యాల వంటి కథలు, పాటలు మన పిల్లలకు ఉపయోగ పడడమే కాక, మనను, ఒక్క సారి మన బాల్యానికి తీసుకు వెళ్ళి జ్ఞాపకాల వీధులలో తిప్పుతాయి.
స్తోత్రలహరి వారి బాలలహరి ఇక్కడ పిల్లల విభాగంలో పెద్ద బాల శిక్ష ఉంది. కొన్ని సరళమైన ప్రార్థన పద్యాలు ఉన్నాయి.

బబ్లూ ఇక్కడ అచ్చులతో పదాలు, పళ్ళు, జంతువులు, వాహనాలు వంటి పదజాలం, వాటితో చిన్న చిన్న వాక్యాలు, కొన్ని కథలు ఉన్నాయి. అన్నిటికీ బొమ్మలు, మాటలు ఉన్నాయి.

తెలుగులో పిల్లలకై ఉద్దేశించినవి కాకున్నా, పిల్లలతో పాటు సందర్శించగలిగిన సైట్లు:

సురస సంగీత నిలయం

మా తెలుగు తల్లికి మల్లెపూదండ, గురజాడ వారి దేశభక్తి గీతం, బంగారు పాపాయి బహుమతులు పొందాలి వంటి పాటలు ఇక్కడ వినవచ్చు.

 

తెలుగు వికిపీడియా 

తెలుగు ప్రముఖులనుంచి పల్లెటూళ్ళ దాకా విశేషాలు, విషయాలూ ఇక్కడ తెలుసుకోవచ్చు, తెలియచేయవచ్చు.